Dövlət Statistika Komitəsi Qadınlar Günü ərəfəsində arayış yayıb. Novator.az-ın məlumatına görə, arayışda qeyd olunur ki, 2019-cu ilin əvvəlinə Azərbaycan əhalisinin 50,1 faizi və ya 4 milyon 999,1 min nəfəri qadınlar olub.

Arayışa əsasən, ölkədə 17 doğum evi, 130 qadın məsləhətxanası, 248 uşaq poliklinikası və ambulatoriyası qadınların sağlamlığının keşiyində durur.

Məşğul əhalinin ümumi sayında qadınların xüsusi çəkisi 48,2 faiz göstərilir. Ölkənin ümumi təhsil müəssisələrində müəllimlərin 80,1 faizi, orta ixtisas təhsil müəssisələrində 78,9 faizi, ali təhsil müəssisələrində 52 faizi, həkimlərin 62 faizi qadınlardır.

Ümumi təhsil müəssisələrində şagirdlərin 46,9 faizi, orta ixtisas təhsil müəssisələrində oxuyanların 65,7 faizi, ali təhsil müəssisələrinin tələbələrinin 48,2 faizi qızlardır.

Elmi işçilərin 58,1 faizini qadınlar təşkil edir.

Dövlət qulluğunda çalışanlar arasında qadınların xüsusi çəkisi 28,6 faiz, sahibkarlar arasında 21,5 faizdir.

Milli Məclisdə qadın deputatların xüsusi çəkisi 16,8 faiz, bələdiyyə üzvləri arasında 35 faiz həddindədir.

Sürücülük vəsiqəsi alanların ümumi sayında qadınların xüsusi çəkisi 2018-ci ildə 7,4 faizə çatıb.

8 Mart qadınların hüquq bərabərliyi uğrunda mübarizədə beynəlxalq həmrəyliyi günü kimi tarixə düşüb. Sosialist qadınların 1910-cu ildə Kopenhagendə keçirilmiş beynəlxalq konfransında 8 Martın bayram edilməsi haqqında qərar qəbul edilib.

1965-ci ildə Azərbaycan Sovet Sosialist Respublikasında martın 8-i iş günü hesab olunmayan bayram günü elan edilib. Azərbaycan müstəqillik əldə edəndən sonra martın 8-i bayram statusunu saxlayıb, Qadınlar Günü kimi qeyd olunur.