İşdən çıxarılan xadimə əmək kitabçasını ala bilmir
Bakı şəhər sakini, 1954-cü il təvəllüdlü Cəmilə Minqəli qızı Həsənova Novator.az saytının redaksiyasına şikayət edib. O bildirir ki, 2009-cu ildən Bakı Şəhər İcra Hakimiyyətinin Kino Xidməti İdarəsində xadimə işləyib. 2018-ci ilin dekabrında Kino Xidməti İdarəsi ləğv olunub və o, həmin ayın 25-dən işsiz qalıb. Lakin Cəmilə Həsənova indiyədək Bakı Şəhər İcra Hakimiyyətindən əmək kitabçasını ala bilməyib: “Bakı Şəhər İcra Hakimiyyətinin kadr məsələləri sektoruna müraciət edəndə hər dəfə mənə əmək kitabçasının hələ hazır olmadığını deyirlər. Bir əmək kitabçasını yazmaq nə çətin işdir ki, indiyədək bunu uzadırlar? Artıq mən şikayətimi mediaya bildirmək məcburiyyətində qalmışam”.
Cəmilə Həsənova qeyd edib ki, o, 2013-cü ildən pensiyaçıdır. İndi işsiz qaldığına görə pensiyasının məbləği artırılmalıdır. Bundan ötrü o, əmək kitabçasını Dövlət Sosial Müdafiə Fonduna təqdim etməlidir: “Əmək kitabçamı isə ala bilmirəm ki, pensiyamın artırılması məsələsini həll edim. Məni işdən çıxarıblar, üstəlik, əlavə problem də yaradırlar”.
