Rusiyalıların 17%-i ölkədən getmək istəyir
“Levada” sorğu mərkəzi rusiyalıların xaricdə yaşamağa necə yanaşdığını araşdırıb. Novator.az-ın məlumatına görə, 2018-ci il dekabrın 13-14-də 52 bölgənin 136 yaşayış məntəqəsində aparılan sorğu əhalinin 17%-nin Rusiyanı tərk etmək istədiyini üzə çıxarıb.
Araşdırmaya yaşı 18-dən yuxarı 1600 respondent cəlb olunub. Nəticələrə əsasən, xaricdə yaşamaq üçün ölkədən getmək istəyənlərin 41%-i 18-24 yaş arası gənclərdir. Yaşı 55-i ötənlərin isə 5%-i ölkədən köçmək arzusundadır.
Sorğu respondentlərin 61%-nin xaricə köçmək fikrində olmadığını göstərib.
Paytaxt Moskvanın sakinlərinin 21%-i, əyalətlilərin isə 11%-i xaricə köçmək istədiyini dilə gətirib.
Federal Statistika Xidmətinin hesabata əsasən, 2019-cu il yanvarın 1-nə Rusiyanın 146 milyon 793,7 min nəfər əhalisi olub. 2018-ci ildə əhalinin sayı 86 min 700 nəfər azalıb.
Səidə Hüseynova
