Ananın sosial müdafiəsi: Azərbaycanda və Estoniyada
İqtisadçı Rövşən Ağayev Azərbaycanda yeni övlad dünyaya gətirmiş anaların sosial müdafiəsini yarıtmaz sayır. Novator.az-ın məlumatına görə, özünün “Facebook” səhifəsində şərh yayan ekspert bildirir ki, uşaq anadan olandan sonra ana cəmi 2 ay (daha dəqiqi 56 gün) maaşa bağlı müavinət ala bilir: “Müavinətin məbləği məzuniyyətə çıxılan tarixə orta aylıq qazancın 100%-i qədərdir. 56 gün bitəndən sonra ana işləmək istəməsə, uşağın yaş yarımı olanadək 40 manat, yaş yarımından 3 yaşınadək isə cəmi 25 manat müavinət ala bilir.
Beynəlxalq təcrübənin gözü ilə baxanda çox acınacaqlı durumdur. Estoniyada övlad dünyaya gətirən ana 3 yaşa qədər uşağına özü baxmaq istəsə, 3 il ərzində sonuncu maaşının 50%-i qədər müavinət alır. Bu müddətdə ana yeni övlad sahibi olsa, əlavə olaraq maaşının 50%-i də həmin uşaq üçün verilir.
Ana övladına 8 yaşınadək özü qulluq etmək istəsə, sonrakı 5 ildə son maaşının 25%-i qədər müavinət alır. 8 yaşınadək uşaqların sayı 1-dən çoxdursa, 25% hər uşaq üçün ayrıca ödənir”.
