Novator.az işğala məruz qalmış bölgələr üzrə əhali statistikasına nəzər salıb.

Tam işğal edilmiş, Azərbaycana bağlı hakimiyyət strukturları olmayan Xankəndi şəhərinin əhalisini Dövlət Statistika Komitəsi 2018-ci il oktyabrın 1-nə 55,8 min nəfər göstərib. Azərbaycan qanunvericiliyi əsasında yaradılmış Xankəndi seçki dairəsində isə 4838 seçici qeydiyyata alınıb.

Bütünlüklə işğal edilmiş rayonlardan Laçının əhalisi oktyabrın 1-nə 77,5 min nəfər, Zəngilanın əhalisi 44,7 min nəfər, Qubadlının əhalisi 41 min nəfər, Şuşanın əhalisi 34,1 min nəfər, Xocalının əhalisi 28,5 min nəfər olub.

Bir hissəsi işğal edilmiş Fizuli rayonunun əhalisi 132 min nəfər həddində rəsmiləşib.

Kiçik bir hissəsi Azərbaycanın nəzarətində olan rayonlardan Cəbrayılın əhalisi Dövlət Statistika Komitəsinin hesabatında 80,6 min nəfər, Xocavəndin əhalisi 43,8 min nəfərdir.

Keçmiş Ağdərə rayonunun da böyük bir hissəsi işğaldadır. Azərbaycan parlamenti 1992-ci ildə bu rayonu ləğv edərək Kəlbəcər, Ağdam, Tərtər rayonları arasında bölüşdürüb.

Tam işğal edilmiş Kəlbəcərin əhalisi, rəsmi statistikaya görə, 92,8 min nəfərdir.

Bir hissəsi işğal olunmuş Ağdamın əhalisi oktyabrın 1-nə 201,5 min nəfər göstərilib.

Tərtərin 104 min nəfər əhalisi var.

Qazax rayonunun 7, Sədərək rayonunun 1 kəndi işğaldadır.

Oktyabrın 1-nə Qazax rayonunun 97,4 min nəfər, Sədərək rayonunun 15,9 min nəfər əhalisi olub.