Anım ziyarəti
- 12 Dekabr 2018
- comments
- Novator.az
- Posted in Xəbər
Azərbaycanın üçüncü prezidenti Heydər Əliyevin vəfatından 15 il keçir. Dekabrın 12-də prezident İlham Əliyev və ailə üzvləri Bakının Fəxri xiyabanında Heydər Əliyevin məzarını ziyarət ediblər. AZƏRTAC-ın məlumatına görə, mərasimə baş nazir Novruz Məmmədov, Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev, Milli Məclisin deputatları, nazirlər, komitələrin, şirkətlərin və idarələrin rəhbərləri, ictimaiyyətinin nümayəndələri də qatılıb.
Heydər Əliyev 1923-cü il mayın 10-da Naxçıvan şəhərində anadan olub. Azərbaycan Dövlət Universitetinin (indiki BDU) tarix fakültəsini bitirib, həmçinin Leninqrad şəhərində (indiki Sankt-Peterburq) dövlət təhlükəsizliyi üzrə xüsusi ali təhsil alıb.
1941-ci ildən Naxçıvan Xalq Daxili İşlər Komissarlığında və Xalq Komissarları Sovetində çalışıb.
1944-cü ildə dövlət təhlükəsizliyi orqanlarına keçən Heydər Əliyev 1965-ci ildən Azərbaycan Dövlət Təhlükəsizliyi Komitəsi sədrinin müavini, 1967-ci ildən sədri vəzifəsini tutub, general-mayor rütbəsinə qədər yüksəlib.
1969-cu il iyulun 14-də Heydər Əliyev Azərbaycan Kommunist Partiyası Mərkəzi Komitəsinin birinci katibi seçilərək respublika rəhbəri, 1982-1987-ci illərdə Sovet İttifaqı Kommunist Partiyası Mərkəzi Komitəsi Siyasi Bürosunun üzvü, SSRİ Nazirlər Soveti sədrinin birinci müavini olub.
1990-cı ildə Heydər Əliyev Azərbaycan parlamentinin və Naxçıvan Ali Sovetinin deputatı seçilib, 1991-1993-cü illərdə Naxçıvan Muxtar Respublikası Ali Məclisinin sədri postunu tutub.
1992-ci ildə Yeni Azərbaycan Partiyasının sədri seçilib.
Heydər Əliyev 1993-cü il iyunun 15-də Azərbaycan Ali Sovetinin sədri seçilib, iyunun 24-də Milli Məclisin qərarı ilə prezident səlahiyyətlərini həyata keçirməyə başlayıb.
1993-cü və 1998-ci illərdə Azərbaycan prezidenti seçilib.
2003-cü il dekabrın 12-də vəfat edib.