“Tvitter” şirkəti 2018-ci ilin üçüncü rübünün hesabatını yayıb. Novator.az-ın məlumatına görə, hesabatda eyni adlı sosial şəbəkənin istifadəçi sayında azalma qeydə alındığı vurğulanır.

Üçüncü rübün nəticələrinə əsasən, “Tvitter”in gəlir və mənfəətində artım qeydə alınsa da, sosial şəbəkənin populyarlığı aşağı düşüb. İkinci rübdə şəbəkənin 330 milyon fəal istifadəçisi olub, üçüncü rübdə istifadəçi sayı 326 milyon nəfərə düşüb. Bir il əvvəl doqquz ayın yekununda fəal istifadəçi sayı isə 335 milyon nəfər göstərilib.

Ancaq ötən ilin üçüncü rübü ilə müqayisədə sosial şəbəkədən gündəlik istifadə edənlərin sayı 9% artıb.

Hesabatda qeyd olunur ki, “Tvitter”də qeydiyyatdan keçənlərin sayında davamlı artım qeydə alınsa da, onların çoxu ya sosial şəbəkədən nadir hallarda istifadə edir, ya da ümumiyyətlə səhifəyə daxil olmur.

2018-ci ilin üçüncü rübündə “Tvitter”in ümumi gəliri 758 milyon dollara yaxınlaşıb. Bu, 2017-ci ilin eyni dövrü ilə müqayisədə 29% çoxdur.

Üçüncü rübün nəticələrinə əsasən, şirkətin mənfəəti 106 milyon dollar olub. Bir il əvvəlin müvafiq dövrünü şirkət 21 milyon dollar ziyanla başa vurmuşdu.

2006-cı ilin martından fəaliyyət göstərən “Tvitter” sosial şəbəkəsini Cek Dorsi, Noa Qlass, Evan Vilyams və Biz Stoun yaradıblar. Şəbəkədə gündə 500 milyon “tvit”in dərc olunduğu bildirilir.

Səidə Hüseynova