Rusiyada jurnalistə inanırlarmı?
Rusiyanın “Mediastandart” fondu və “Sirkon” tədqiqat qrupu əhalinin jurnalistlərə münasibətini araşdırıb. Novator.az-ın məlumatına görə, tədqiqat bu yay 1604 respondent arasında keçirilmiş sorğunun nəticələrinə əsaslanır.
Sorğuya qatılan respondentlərin 65%-i jurnalist peşəsinin hörmətə layiq olduğunu bəyan edib. 15% əks fikir bildirib.
Respondentlərin 41%-i jurnalistlərin ölkənin inkişafına töhfə verdiyini deyib. 12% bunun əksini düşünür, 30% isə hesab edir ki, jurnalistlərin cəmiyyətə ciddi təsiri yoxdur.
Sorğu iştirakçılarının 37%-i jurnalistlərə etibar etdiyini, 24%-i onlara inanmadığını, 35%-i isə media əhlinin bir qisminə etimad göstərdiyini deyib.
Kütləvi informasiya vasitələrinin özünə inama gəlincə, respondentlərin 50%-i mənfi rəy bildirib. Yalnız 17% KİV-ə tam etibar etdiyini vurğulayıb.
Respondentlərin 63%-i dövlət televiziya kanallarında yayımlanan informasiya proqramlarına inandığını bildirib. 44% internet mənbələrinə, 14% özəl KİV-lərə, 4% xarici mediaya etibarını ifadə edib.
Səidə Hüseynova
