Uşağı döymək cəmiyyəti zora salır
Hansı cəmiyyətdə uşaqlara fiziki cəzaların verilməsi adi qarşılanırsa, o cəmiyyətdə ümumən zorakılığın həddi yüksək olur. Və əksinə: harada uşağı döymək olmazsa, orda başqa zorakılıqların da sayı azdır. Bunu ABŞ, İsrail və Kanada alimlərinin birgə apardığı tədqiqat göstərib.
Novator.az xəbər verir ki, tədqiqat 2003-cü ildən 2014-cü ilə qədər dünyanın 88 ölkəsində aparılıb. Tədqiqat zamanı 11-25 yaş arasında olan 400 min adam sorğuya cəlb olunub.
Alimlər ölkələrin qanunlarına da nəzər salıblar. Aydın olub ki, bəzi ölkələrdə uşaqlara fiziki cəza verilməsi tam yasaqlanıb, bəzilərində qismən qadağalar var, bəzi ölkələrdə isə belə məsələlər qanunla tənzimlənmir.
Uşaqlara fiziki cəza verilməsinin qanunla tənzimlənmədiyi Mərakeş və Zimbabve kimi ölkələrdə oğlanların mübahisələri yumruq davası hesabına həll etməsi hallarının başqa ölkələrlə müqayisədə qat-qat çox olduğu üzə çıxıb.
Uşağı döyməyin qəti qadağan olunduğu Almaniya, İsveç, Tunis kimi ölkələrdə isə ümumən zorakılıq halları aşağıdır. Məsələn, Mərakeş və Zimbabve kimi ölkələrlə müqayisədə 58 faiz daha azdır.
Tədqiqatçılar bu qənaətə gəliblər ki, istənilən zorakılıq daha böyük zorakılıqlara gətirib çıxarır.
Səidə Hüseynova
