Müsavat Partiyasının üzvü Azad Həsənov barəsində cinayət işinə başlanıb.

Ona Cinayət Məcəlləsinin 234.4.3-cü (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, saxlama, daşıma, göndərmə və ya satma) maddəsi ilə ittiham irəli sürülüb.

Vəkil Osman Kazımov “Amerikanın səsi”nə bildirib ki, oktyabrın 12-də Xətai Rayon Məhkəməsi Azad Həsənov barəsində 4 ay müddətinə həbs qətimkan tədbiri seçib.

İttiham məhkəmədə sübut olunarsa, Azad Həsənovu əmlakı müsadirə edilməklə 5 ildən 12 ilədək həbs gözləyir.

Azad Həsənov 2014-cü ildən Litvada yaşayır. 2018-ci il oktyabrın 10-da o, ağır xəstə olan atasına baş çəkmək üçün Azərbaycana gəlib. Ailə üzvlərinin dediyinə görə, Azad Həsənov sərhədi problemsiz keçib, günortaya qədər Bakıda atası ilə bir yerdə olub.

Azad Həsənov oktyabrın 10-u günorta saatlarında saxlanıb.

Müsavat Partiyası bu həbsi hakimiyyətin qisasçılıq və repressiya siyasətinin tərkib hissəsi kimi qiymətləndirir.

Partiyanın mətbuat xidməti Azad Həsənovun 2003-cü ildən Müsavatın fəal üzvü olduğunu, 2014-cü ilin fevralında mühacirət etdiyini və ailəsi ilə birgə Litvadan siyasi sığınacaq aldığını vurğulayır.