Rəsmi: Ermənistandan köç azalır
Ermənistanın Ərazi İdarəçiliyi və İnkişafı Nazirliyinin Miqrasiya Xidməti yeni hesabat yayıb. Novator.az xəbər verir ki, hesabata əsasən, 2018-ci ilin ilk 6 ayında ölkəni 25 min 649 nəfər tərk edib. Bu, 2017-ci ilin eyni dövrü ilə müqayisədə 5204 nəfər azalma deməkdir. Ötən ilin ilk yarısında Ermənistandan 30 min 853 nəfər köçmüşdü.
Məlumatda bu ilin ilk yarısında 796 Ermənistan vətəndaşının Avropa ölkələrində, 1529 nəfərin digər ölkələrdə sığınacaq almaq üçün müraciət etdiyi vurğulanır.
Ərazi İdarəçiliyi və İnkişafı Nazirliyinin Miqrasiya Xidməti Avropa ölkələrindən vətəndaşlıq almaq üçün müraciət edənlərin sayının azaldığını da bildirir. Avropa İttifaqının Statistika Xidmətinə istinadla qeyd olunur ki, 2018-ci ilin ilk 6 ayında 2 min 490 Ermənistan vətəndaşı Avropada vətəndaşlıq almaq üçün müraciət edib. Ötən ilin eyni dövründə bu göstərici 3 min 270 nəfər olub.
Ərazi İdarəçiliyi və İnkişafı Nazirliyinin Miqrasiya Xidməti Ermənistandan köçün azalmasını bu ilin yazında hakimiyyətin dəyişməsi ilə bağlayır.
1998-2018-ci illərdə Ermənistanı Azərbaycanın Dağlıq Qarabağ bölgəsindən olan şəxslər idarə edib. Bu ilin aprelində xalq etirazları ilə qarabağlıların hökmranlığına son qoyulub.
Səidə Hüseynova
