Paşinyan daha bir inqilaba gedir
Ermənistanda siyasi böhran yaranıb. Buna oktyabrın 2-də parlamentin öz reqlamentinə dəyişiklik etməsi yol açıb. Novator.az bildirir ki, reqlamentdəki yeniliyə görə, kvorum alınmadığı və ya deputatların iclaslarda iştirakına maneə törədildiyi hallarda qanunverici orqan iclasını başqa vaxta keçirə bilər. Baş nazir Nikol Paşinyan reqlamentin yenilənməsinə qarşı çıxaraq tərəfdarlarını parlamentin binası qarşısına toplayıb. O bəyan edib ki, reqlamentdəki yenilik parlamentin buraxılmasının qarşısını almağa yönəlib.
Ermənistan Konstitusiyasına əsasən, baş nazir istefa verdikdən sonra parlament iki həftə ərzində hökumətin yeni başçısını seçməlidir. Əks halda qanunverici orqan buraxılır. Bu il mayın 8-də inqilabi proseslər fonunda baş nazir postunu tutan Nikol Paşinyan istefa vermək niyyətindədir. Plana əsasən, o, istefa verərkən baş nazir səlahiyyətlərinin icraçısı olaraq qalır, iki həftə ərzində parlament yeni baş naziri seçmir və buraxılır, növbədənkənar seçki təyin olunur.
Ermənistanın indiki parlamenti 2017-ci ilin yazında seçilib. Nikol Paşinyanın sədrlik etdiyi Vətəndaş Sazişi Partiyasının və müttəfiqlərinin yaratdığı “Çıxış” bloku 105 yerlik parlamentdə 9 mandata sahibdir. Sabiq prezident Serj Sərkisyanın partiyasının – Respublika Partiyasının parlament fraksiyası 50 nəfərdən, böyük əksəriyyəti Çiçəklənən Ermənistan Partiyasının üzvləri olan Sarukyan bloku 31 nəfərdən, Daşnaksütun Partiyasının fraksiyası 7 nəfərdən ibarətdir. 8 deputat heç bir fraksiyaya qatılmır.
Nikol Paşinyan bu ilin dekabrında növbədənkənar parlament seçkisi keçirilməsini istəyir. Bunun üçün ilk növbədə indiki parlament buraxılmalıdır. Həmin prosesi əngəlləyən reqlament dəyişikliyi Ermənistan Respublika Partiyasının təşəbbüsü olub. Oktyabrın 2-si axşam parlamentdə keçirilən səsvermədə Çiçəklənən Ermənistan Partiyası və Daşnaksütun Partiyasından bəzi deputatlar da yeniliyə tərəfdar olublar. Bundan sonra prezident Armen Sərkisyan Nikol Paşinyanın təqdimatını nəzərə alaraq bu iki partiyanın hökumətdəki təmsilçilərini – ümumilikdə 6 naziri vəzifədən çıxarıb. Baş nazirin çağırışı ilə parlament binası önündə aksiya keçirilib. Nikol Paşinyan gecə saatlarında Respublika Partiyası, Çiçəklənən Ermənistan Partiyası və Daşnaksütun Partiyası fraksiyalarının nümayəndələri ilə şəxsən danışıqlar aparıb. O, danışıqlardan sonra aksiyaçılara deyib ki, Respublika Partiyası, Çiçəklənən Ermənistan Partiyası və Daşnaksütun Partiyası parlamentin buraxılması mexanizminin işə düşməsinə razılaşıblar. Nikol Paşinyan növbədənkənar parlament seçkisinin dekabrın ilk yarısında keçiriləcəyini bəyan edib.
2008-2018-ci illərdə prezident postunu tutan Respublika Partiyasının sədri Serj Sərkisyan aprelin 17-də baş nazir kürsüsünə oturub, ancaq xalq etirazlarına görə aprelin 23-də istefa verməyə məcbur olub. Xalq etirazlarına Nikol Paşinyan başçılıq edib.
