Ukraynada 2019-cu ilin yazına nəzərdə tutulan prezident seçkisi ilə bağlı daha bir sorğu keçirilib. Novator.az-ın məlumatına görə, sorğunu Kiyev Beynəlxalq Sosiologiya İnstitutu sentyabrın 8-dən 23-nə qədər yaşı 18-dən yuxarı 2026 respondentlə müsahibə formasında aparıb.

Sentyabrın 26-da açıqlanan nəticələrə görə, respondentlərin 19,3%-i deputat Yuliya Timoşenkonu prezident görmək istəyir.

Sorğu iştirakçılarının 11,9 %-i indiki prezident Pyotr Poroşenkoya səs vermək niyyətində olduğunu deyib, 11,8%-i şoumen Vladimir Zelenskiyə dəstək nümayiş etdirib.

Respondentlərin 10,9 %-i sabiq müdafiə naziri Anatoli Qritsenkoya, 8,4%-i müğənni Svyatoslav Vakarçuka, 8,1%-i deputat Yuri Boykoya, 7,5%-i deputat Vadim Rabinoviçə, 6,7%-i deputat Oleq Lyaşkoya, 4,2%-i Lvov şəhərinin meri, Samopomoş Partiyasının lideri Andrey Sadovıya, 2%-i iş adamı Aleksandr Şevçenkoya səs vermək istədiyini deyib.

Ötən gün Ukraynanın “Reytinq” sosioloji qrupunun keçirdiyi analoji sorğunun nəticələri açıqlanmışdı. Sentyabrın 10-dan 18-nə qədər üzbəüz müsahibə yolu ilə keçirilmiş, 2 min 500-dən çox respondentin qatıldığı sorğuda Yuliya Timoşenko önə çıxıb. Sorğu iştirakçılarının 13,2%-i onu prezident görmək istəyib. Vladimir Zelenski 7,8 %-lə ikinci, Pyotr Poroşenko 6,8%-lə üçüncü olub.

Səidə Hüseynova