Təzyiqə necə güc gəlməli?
Amerika Ürək Assosiasiyası hipertoniya xəstəliyinə qarşı mübarizə üzrə tədqiqatın nəticələrini açıqlayıb. Novator.az xəbər verir ki, “EurekAlert” portalında dərc olunan nəticələrə görə, həyat tərzində 16 həftəlik dəyişiklik qan təzyiqini aşağı salmağa və hipertoniya ilə dərmansız mübarizəyə yol açır.
Alimlər artıq çəkidən və yüksək təzyiqdən əziyyət çəkən 40-80 yaş arası 129 nəfəri eksperimentə cəlb ediblər. Tədqiqat iştirakçıları üç qrupa bölünüb, onlar üçün 16 həftəlik xüsusi proqram hazırlanıb.
Birinci qrupa daxil olanlar meyvə-tərəvəzin çox, qırmızı ət, duz və şirniyyatın az olduğu pəhrizə keçiblər, həmçinin həftədə üç dəfə məşqçinin iştirakı ilə idmanla məşğul olublar.
İkinci qrup idmanla məşğul olmadan eyni pəhrizlə qidalanıb.
Üçüncü qrup nə pəhriz saxlayıb, nə də idman edib.
Hər üç qrup eksperiment dövrünü dərmansız keçirib.
Birinci qrupun nümayəndələrinin çəkisi orta hesabla 8,6 kiloqram azalıb, onların yuxarı təzyiqi 16, aşağı təzyiqi 10 bənd enib. Onların yalnız 15 faizinin sonradan dərmana ehtiyacı qalıb.
Tədqiqatın nəticələrini şərh edən kardioloqlar yüksək arterial təzyiqdən (yuxarı təzyiq 130-160, aşağı təzyiq 80-90) əziyyət çəkən xəstələrə pəhriz saxlamağı və idmanla məşğul olmağı tövsiyə edir.
Səidə Hüseynova
