Dünyada 40 milyondan çox kölə var
Mərkəzi qərargahı Avstraliyada olan “Walk Free” hüquq müdafiə təşkilatı köləlik hesabatı açıqlayıb. Novator.az-ın məlumatına görə, “Global Slavery İndex” adlı hesabat dünyanın 167 ölkəsindən, 71 mindən çox respondentdən alınan məlumatlara əsaslanır.
Meyar kimi məcburi əməyin və uşaq əməyinin müxtəlif formalarına, habelə məcburi nikaha məruz qalma, orqan satışı məqsədilə insan alverinin qurbanı olmaq seçilib. Cəzaçəkmə müəssisələrində işləyən məhbuslar da nəzərə alınıb.
“Walk Free”nin hesabatında dünyada 40 milyon 300 min insanın köləliyə məhkum olduğu açıqlanır. Onların 71%-i qadınlardır.
Köləlik reytinqinə Şimali Koreya liderlik edir. Bu ölkənin 2 milyon 64 min sakini məcburi əməyin qurbanıdır. Onları məcburi əməyə dövlətin sövq etdiyi vurğulanır.
Köləlik qurbanlarının sayına görə ikinci yerdə Eritreya göstərilib. Bu ölkədə hər 1000 nəfərdən 93-ü kölədir.
Üçüncü yerdə Burundi qərarlaşıb. Bu ölkədə hər 1000 nəfərdən 40-ı köləliyin qurbanı sayılır.
Köləlik reytinqinin ilk onluğunda sonrakı sıralama belədir:
Mərkəzi Afrika Respublikası – hər 1000 nəfərə 22,3 kölə
Əfqanıstan – hər 1000 nəfərə 22,2 kölə
Mavritaniya – hər 1000 nəfərə 21,4 kölə
Cənubi Sudan – hər 1000 nəfərə 20,5 kölə
Pakistan, Kamboca – hər 1000 nəfərə 16,8 kölə
İran – hər 1000 nəfərə 16,2 kölə.
Səidə Hüseynova
