Özünü cavan sayanın beyni gec qocalır
Özünü yaşından cavan hiss edən adamın beyni daha gec qocalır. Novator.az-ın məlumatına görə, Cənubi Koreya alimlərinin apardığı tədqiqat bunu göstərib. Seul Milli Universitetinin alimlərinin gəldiyi qənaətə görə, özünü yaşından cavan hiss edən adamın beynində boz maddə çoxluq təşkil edir. Bu maddə eşitmə qabiliyyəti, emosiyalar, qərar qəbuletmə və özünə nəzarətlə bağlıdır. Belə adamların yaddaşı daha güclü olur, onlar özlərini daha sağlam hiss edirlər və depressiyaya qapılmağa meylli deyillər.
Araşdırmaya əsasən, özünü cavan hiss edən adamın beyninin struktur xüsusiyyəti gənc insanın beynini xatırladır. Alimlər hesab edirlər ki, insanın özünü olduğundan yaşlı hiss etməsi beynində boz maddənin itməsi səbəbindən ola bilər. Belə insana gündəlik məsələlər çətin gəlir.
Koreyalı mütəxəssislər tədqiqat zamanı 59-84 yaş arası 68 sağlam insanın beyin tomoqrafiyasının nəticələrini analiz ediblər. Bundan başqa alimlərin əlində könüllülərin özlərini hansı yaşda hiss etmələri ilə bağlı sorğunun nəticələri olub. Tədqiqatda bilik funksiyalarını müəyyən etmək üçün yaddaş keyfiyyəti üzrə testlər, depressiya simptomlarının olub-olmamsı da nəzərə alınıb.
Alimlər bu qənaətə gəliblər ki, özünü daha cavan hiss edənlər daha sağlam həyat tərzi keçirən insanlardır.
Səidə Hüseynova
