UEFA Avropa Liqasının final oyununun Bakıda keçirilməsi ilə əlaqədar təşkilat komitəsi yaradılıb. Final 2019-cu il mayın 29-u Bakı Olimpiya Stadionunda olacaq.
Novator.az-ın məlumatına görə, prezident İlham Əliyevin 7 may sərəncamı ilə baş nazirin birinci müavini Yaqub Eyyubov təşkilat komitəsinin sədri təyin olunub. Ona AFFA prezidenti Rövnəq Abdullayev müavinlik edəcək. Rövnəq Abdullayev final oyununun Bakıda keçirilməsi ilə bağlı əməliyyat işlərinin rəhbəridir.
Təşkilat komitəsinin üzvləri bu şəxslərdir: Yusuf Məmmədəliyev (Prezident Administrasiyasının gənclər siyasəti və idman məsələləri şöbəsinin müdiri), Azad Rəhimov (gənclər və idman naziri, Milli Olimpiya Komitəsinin vitse-prezidenti), Elmar Məmmədyarov (xarici işlər naziri), Ramil Usubov (daxili işlər naziri), Kəmaləddin Heydərov (fövqəladə hallar naziri), Şahin Mustafayev (iqtisadiyyat naziri), Samir Şərifov (maliyyə naziri), Mikayıl Cabbarov (vergilər naziri), Oqtay Şirəliyev (səhiyyə naziri), Əbülfəs Qarayev (mədəniyyət naziri), Ramin Quluzadə (nəqliyyat, rabitə və yüksək texnologiyalar naziri), Ceyhun Bayramov (təhsil naziri), Səfər Mehdiyev (Dövlət Gömrük Komitəsinin sədri), Mədət Quliyev (Dövlət Təhlükəsizliyi Xidmətinin rəisi), Elçin Quliyev (Dövlət Sərhəd Xidmətinin rəisi), Vüsal Hüseynov (Dövlət Miqrasiya Xidmətinin rəisi), Cahangir Əsgərov (“Azərbaycan Hava Yolları” Qapalı Səhmdar Cəmiyyətinin prezidenti), Etibar Pirverdiyev (“Azərenerji” Açıq Səhmdar Cəmiyyətinin prezidenti), Balababa Rzayev (“Azərişıq” Açıq Səhmdar Cəmiyyətinin sədri), Çingiz Hüseynzadə (Milli Olimpiya Komitəsinin vitse-prezidenti), Anar Ələkbərov (Heydər Əliyev Mərkəzinin direktoru), Vüsal Kərimli (Bakı Nəqliyyat Agentliyinin direktoru), Elxan Məmmədov (AFFA-nın baş katibi, UEFA Avropa Liqasının final oyununun Bakıda keçirilməsi üzrə əlaqələndirici).
Finalın Bakıda keçirilməsi ilə bağlı bütün təşkilati işlərin icra olunması, UEFA ilə əlaqələndirmə işlərinin aparılması Azərbaycan Futbol Federasiyaları Assosiasiyasına həvalə olunub. Bu qurum xüsusi tədbirlər planı hazırlayıb təşkilat komitəsinə təqdim etməlidir.
