11 aprel prezident seçkisinin səsvermə raundu saat 19-da bitəcək. Mərkəzi Seçki Komissiyasının yeni hesabatına görə, saat 15-dək seçkiyə seçicilərin 60,7 faizi qatılıb.

Səsvermə səhər saat 8-də başlayıb. Ölkədə 5 milyon 314 min 365 nəfər seçici var. Saat 15-ə 3 milyon 227 min 817 seçicinin səs verdiyi açıqlanıb.

Prezident postu uğrunda 8 nəfər mübarizə aparır: dövlət başçısı İlham Əliyev, Milli Məclisin deputatları Araz Əlizadə, Fərəc Quliyev, Qüdrət Həsənquliyev, Zahid Oruc, Azərbaycan Demokrat Partiyasının sədri Sərdar Cəlaloğlu, Müasir Müsavat Partiyasının sədri Hafiz Hacıyev, siyasətçi Razi Nurullayev.

Namizəd səsvermədə iştirak etmiş seçicilərin yarısından çoxunun səsi ilə prezident seçilmiş sayılır. Seçki Məcəlləsinə görə, Mərkəzi Seçki Komissiyası aprelin 11-dən başlayaraq uzağı 10 gün ərzində prezident seçkisinə yekun vurub nəticələri təsdiq olunmaq üçün Konstitusiya Məhkəməsinə təqdim etməlidir. Konstitusiya Məhkəməsi nəticələri təsdiqləyəndən uzağı 3 gün sonra yeni seçilmiş prezident and içərək səlahiyyətlərinin icrasına başlamalıdır.

2016-cı ildə konstitusiyaya edilmiş dəyişikliklə prezidentlik müddəti 5 ildən 7 ilə qaldırılıb.