İsa Qəmbər Almaniyaya gedib
Milli Strateji Düşüncə Mərkəzinin sədri İsa Qəmbər Almaniyaya gedib.
Müsavat Partiyasının başqanı Arif Hacılı xəbəri təsdiqləyib. O, Bastainfo.com-a bildirib ki, İsa Qəmbər Almaniyaya aprelin 4-də Avropada yaşayan dostların xahişi ilə yollanıb.
Arif Hacılının sözlərinə görə, İsa Qəmbər Almaniyada tibbi müayinələrdən keçəcək və bir müddət istirahət edəcək.
İsa Qəmbər bu ilin yanvar və fevral aylarında Bakıdakı Mərkəzi Klinik Xəstəxanada, fevralın sonundan mart ayının ortalarınadək isə Türkiyə paytaxtı Ankaranın Hacettepe Universitetinin xəstəxanasında müalicə olunub.
61 yaşlı İsa Qəmbər milli azadlıq hərəkatının liderlərindən biridir. 1990-1995-ci illərdə parlamentin deputatı, 1992-1993-cü illərdə Milli Məclisin sədri olub, 1992-ci il mayın 18-dən iyunun 17-dək prezident səlahiyyətlərini icra edib.
1992-2014-cü illərdə Müsavat Partiyasının başqanı postunu tutub.
