Teyyub Qurban vəfat edib
Fevralın 22-də şair, dramaturq, publisist Teyyub Qurban vəfat edib.
Bastainfo.com xəbər verir ki, Teyyub Qurban 1934-cü ilin dekabrında Bakının Bülbülə qəsəbəsində anadan olub. 1959-cu ildə indiki Bakı Dövlət Universitetini jurnalistika ixtisası üzrə bitirib.
Bakı Pioner və Məktəblilər Sarayında ədəbi yaradıcılıq dərnəyinin rəhbəri (1958-1976), Azərbaycan Xalq Nəzarəti Komitəsində tərcüməçi (1963-1976), komitənin təşkilat şöbəsində təlimatçı (1976-cı ildən), komitənin metodika kabinetinin rəhbəri (1976-1992), Azərbaycan Yazıçılar Birliyinin “Oğuz eli” assosiasiyasının işlər müdiri (1992), Suraxanı Rayon İcra Hakimiyyəti başçısının birinci müavini (1992-1993), Bakı və Kəndlər Birliyinin mətbuat xidmətinin rəhbəri (1994-1996) vəzifələrində çalışıb.
1996-cı ildən ədəbi yaradıcılıqla məşğul olub.
Ədəbi fəaliyyətə 1950-ci illərdən başlayan Teyyub Qurban “Mənim gəncliyim”, “Dostluğun gücü”, “Unudulmayan”, “Yanğı”, “El yolu”, “Gözəllik yarışı”, “Ömrün gənclik yazı”, “Dönməzlik”, “Sara”, “Məcra”, “Düşmənlərindən güclü şəxsiyyət”, “Müqəddəs məkanda Qüdsümüz vardır” və s. kitabların müəllifidir.
Onun Hacı Zeynalabdin Tağıyevə həsr etdiyi “Yaşayan ömür” pyesi 1993-cü ildə Azərbaycan Dövlət Gənclər Teatrında tamaşaya qoyulb.
Teyyub Qurban Müsavat Partiyasının üzvü idi.
Allah rəhmət eləsin!
