Təmizləmə işlərinin yeni hesabatı
Müdafiə Nazirliyinin Xızı rayonundakı N saylı hərbi hissəsinin sursat anbarında ötən il avqustun 27-də baş vermiş partlayışla əlaqədar aparılan təmizləmə işləri barədə hesabat yayılıb. Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) əməliyyat üzrə mütəxəssisi İdris İsmayılov AZƏRTAC-a deyib ki, 9 min 600 hektar ərazidə aparılan təmizləmə işləri nəticəsində 26 min ədədə yaxın müxtəlif növ partlamamış hərbi sursat, 20 min ədədə yaxın partlamış-yanmış sursat qalıqları və 104 tona yaxın yandırma məhsulu aşkarlanaraq götürülüb.
Mütəxəssis bildirib ki, ümumilikdə 10 min hektar ərazidə partlamamış hərbi sursatla çirklənmənin olduğu müəyyənləşib, 124 iş günü ərzində 9 min 600 hektar ərazidə təmizləmə əməliyyatları başa çatdırılıb: “İlkin olaraq Bakı-Quba-Rusiya Federasiyası ilə dövlət sərhədi avtomobil yolu, Bakı-Novorossiysk neft kəməri, Bakı-Rostov dəmir yolu və ərazidən keçən su kanalı, başqa əhəmiyyətli ərazilər təmizlənərək təhvil verilib. Daha sonra yaşayış məntəqələri, eləcə də əkin və otlaq sahələrində işlər yekunlaşdırılıb. İlin sonunadək qalan 400 hektar sahədə də təmizləmə işləri başa çatdırılacaq”.
