İçərişəhərdə yeni layihə
Prezident İlham Əliyev Maqsud İbrahimbəyov Yaradıcılıq Mərkəzinin təsis edilməsinə sərəncam verib. Mərkəz “İçərişəhər” Dövlət Tarix-Memarlıq Qoruğu İdarəsinin strukturuna daxil olacaq. Qurumun təsis edilməsi və fəaliyyətinin təmin olunması üçün “İçərişəhər” Dövlət Tarix-Memarlıq Qoruğu İdarəsinə dövlət büdcəsindən 220 min manat vəsait ayrılır.
“İçərişəhər” Dövlət Tarix-Memarlıq Qoruğu İdarəsi Maqsud İbrahimbəyov Yaradıcılıq Mərkəzinin təsis edilməsi ilə əlaqədar təşkilati məsələləri iki ay müddətində həll etməlidir.
Sərəncam fevralın 1-də imzalanıb.
Novator.az bildirir ki, Maqsud İbrahimbəyov 1935-ci ildə Bakı şəhərində anadan olub. 1960-cı ildə Azərbaycan Politexnik İnstitutunun inşaat fakültəsini bitirib, 1962–1964-cü illərdə Moskvada ali ssenari kurslarında, 1971–1973-cü illərdə ali rejissor kurslarında oxuyub.
1960-cı ildən Azərbaycan Tikinti Nazirliyinin Ağır Sənaye İnşaatı Trestində çalışan Maqsud İbrahimbəyov, 1964-1971-ci illərdə SSRİ Mərkəzi Televiziya və Radio Verilişləri Komitəsinin Azərbaycan üzrə xüsusi müxbiri vəzifəsini tutub, sonrakı illərdə bədii yaradıcılıqla və ictimai fəaliyyətlə məşğul olub.
Nasir, dramaturq, ssenarist və rejissor kimi tanınan Maqsud İbrahimbəyov 1979-cu ildə əməkdar incəsənət xadimi, 1998-ci ildə xalq yazıçısı fəxri adları alıb, Azərbaycan Respublikasının “İstiqlal”, “Şərəf” və “Şöhrət” ordenlərinə layiq görülüb.
Uzun müddət Azərbaycan Pen klubunun prezidenti, Azərbaycan Respublikası Sülh Komitəsinin sədri olub və digər ictimai qurumlara başçılıq edib, bir neçə dəfə Milli Məclisin deputatı seçilib.
Maqsud İbrahimbəyov 2016-cı il martın 22-də vəfat edib.
