Rusiyanın İctimai Rəy Fondu sağlamlıq sorğusu keçirib. Novator.az-ın məlumatına görə, sorğu iştirakçılarının 32%-i xəstələnən kimi həkimə müraciət etdiyini, 63%-i bildiyi üsulla müalicə olunduğunu deyib.

Sorğu göstərib ki, respondentlərin 70%-i səhhətinin qeydinə qalır.

İştirakçıların üçdə biri müayinədən keçmədiyini etiraf edib.

Respondentlərin qalan hissəsi bir neçə ildən bir müayinə olunduğunu vurğulayıb.

Sorğuya qatılanların 47%-i idman və bədən tərbiyəsi ilə məşğul olduğunu, 49%-i düzgün qidalandığını bildirib.

İştirakçıların 36%-i siqaret çəkdiyini, 15%-i bu vərdişi tərgitdiyini, 49%-i heç zaman siqaret çəkmədiyini açıqlayıb.

Respondentlərin 38%-i ildə bir neçə dəfə, 21%-i ayda bir neçə dəfə, 8%-i həftədə bir dəfə, 2%-i isə həftədə iki-üç dəfə spirtli içki qəbul etdiyini deyib. 28% ümumiyyətlə alkoqoldan istifadə etmədiyini bildirib.

Sorğu 2017-ci ilin payızında 104 yaşayış məntəqəsində 1500 respondent arasında aparılıb.

Səidə Hüseynova