“Kanal 13” internet televiziyasının direktoru Əziz Orucov mayın 2-dən həbsdədir. Həmin gün o, polisə müqavimətdə təqsirli bilinərək 30 sutka inzibati həbs cəzası alıb. Sonra ona Cinayət Məcəlləsinin 192.2-ci (qanunsuz sahibkarlıqla külli miqdarda gəlir əldə etmə) və 308.2-ci (ağır nəticələrə səbəb olan vəzifə saxtakarlığı) maddələri ilə cinayət işi başlanıb, haqqında həbs qətimkan tədbiri seçilib. İstintaqı Baş Prokurorluğun Ağır Cinayətlərə Dair İşlər üzrə İstintaq İdarəsi aparıb. İstintaq orqanı Əziz Orucovu dövlət qeydiyyatına alınmamış qrant vəsaitlərindən külli miqdarda qanunsuz gəlir əldə etməkdə təqsirli bilir.
Oktyabrın 10-da Bakı Ağır Cinayətlər Məhkəməsində hakim Mirzə Xankişiyevin sədrliyi ilə Əziz Orucovun məhkəməsi başlanıb. Dekabrın 5-də dövlət ittihamçısı Ramin Nağdəliyev Əziz Orucova 7 il həbs cəzası verilməsini təklif edib. Bu təklifdən sonra, hökm çıxarılmasının gözləndiyi günlərdə Novator.az saytının əməkdaşı Töhfə Əzimova Əziz Orucovun evində olub, jurnalistin anası Almaz Orucova və həyat yoldaşı Lamiyə Orucova ilə söhbətləşib. Videoreportajı təqdim edirik.
