Yağış suyundan enerji istehsal edən qurğu yaradılıb
Bakıda, Zərifə Əliyeva adına liseyin 9-cu sinfində təhsil alan 15 yaşlı Reyhan Camalova Hindistanda keçirilən Qlobal Sahibkarlıq Sammitinə öz ixtirası ilə qatılıb. Təhsil Nazirliyinin məlumatına görə, Reyhan məktəbli dostları və fizika müəllimləri ilə birlikdə yağış suyundan enerji istehsal edən Reynerci (Rainergy) qurğusu yaradıb. Qurğu dörd əsas hissədən: yağış suyunun kollektoru, su çəni, elektrik generatoru və batareyadan ibarətdir. Kollektor su çənini yağış suyu ilə doldurur, su isə elektrik generatorunun içi ilə böyük sürətlə axaraq elektrik enerjisi yaradır. İstehsal olunan enerji akkumulyatorlarda toplanır, elektrik şəbəkəsinin xətlərinə düşən təzyiqi azaldır və ehtiyacı olan icmalara elektrikdən istifadə üçün əlavə mənbə verir.
Reynercinin prototipi hazırda 22 led lampanı işıqlandırır, bu da təqribi 22 vatt enerji deməkdir.
Gənc ixtiraçı deyir ki, bu enerjini çoxaltmağın üzərində işləyirlər: “Bəzi ölkələrdə enerji həddindən artıq bahadır. Bunun üzərində işləyib enerjini çoxaltdıqdan sonra çox az pul xərcləməklə enerji ala biləcəyik”.
