Nazarbayev yeni əlifbaya keçmək üçün fərman hazırlamağı tapşırıb
Oktyabrın 26-da Qazaxıstan prezidenti Nursultan Nazarbayev ölkənin latın qrafikası əsasında yeni əlifbaya keçidi ilə bağlı layihənin təsdiqlənməsi üçün fərman hazırlamağı tapşırıb.
Novator.az-ın məlumatına görə, dövlət başçısı tapşırığı Prezident Administrasiyasının rəhbəri Adilbek Caksıbekova verib.
Qazaxıstan hazırda 42 hərflik kiril əlifbasından istifadə edir. 2017-ci ilin aprelində Nursultan Nazarbayev ilin sonunadək latın qrafikası əsasında əlifba hazırlanmasını təklif edib. O bildirib ki, latın qrafikasına keçidi müasir texnologiya, mühit və kommunikasiya, həmçinin 21-ci əsrin təhsil və elmindəki proseslərin özəllikləri diktə edir.
Latın qrafikası əsasında yeni əlifba Qazaxıstan parlamentinə sentyabrda təqdim olunub.
Oktyabrın 26-da Adilbek Caksıbekovla görüşündə Nursultan Nazarbayev qeyd edib ki, komissiya öz işini bitirib və yeni əlifba layihəsinin son variantı dərc olunub. Dövlət başçısı siyasətçilər, dilçilər, gənclər, alimlər və Qazaxıstan Xalq Assambleyasının nümayəndələri arasında layihə ilə bağlı razılıq əldə olunduğunu və ictimaiyyətin yeni əlifbanı dəstəklədiyini vurğulayıb.
Prezident yeni əlifbaya keçidi mərhələli və sistemli şəkildə aparmağı məsləhət görüb.
Səidə Hüseynova
