QHT-lər üçün təlim: “Vətəndaş cəmiyyəti təşkilatlarının idarəçiliyində gender standartları”
Oktyabrın 19-22-də Bakıda vətəndaş cəmiyyəti təşkilatlarının nümayəndələri üçün seminar keçirilib.
Peşəkar təlimçilərin apardığı seminar gender standartlarının vətəndaş cəmiyyəti təşkilatlarında idarəçilik siyasətinə və prosedurlarına daxil edilməsinə həsr olunub.
Seminar “İnternyus-Azərbaycan” təşkilatının Azərbaycanda vətəndaş cəmiyyətinin inkişafına dəstək təşəbbüsü məqsədilə Avropa İttifaqı tərəfindən maliyyələşdirilən və BMT İnkişaf Proqramının dəstəyilə həyata keçirilən “Həssas əhali qruplarının sosial-iqtisadi hüquqlarının təşviqində vətəndaş cəmiyyətinin rolunun gücləndirilməsi” layihəsi çərçivəsində baş tutub.
Seminarı “Təmiz Dünya” Qadınlara Yardım İctimai Birliyinin sədri Mehriban Zeynalova, hüquqşünas, gender problemləri üzrə ekspert Günel Aslan, Ailə, Qadın və Uşaq Problemləri üzrə Dövlət Komitəsinin informasiya və analitik araşdırmalar şöbəsinin baş məsləhətçisi Raidə Əmirbəyova aparıblar.
Təlimdə paytaxt və regionlarda fəaliyyət göstərən QHT-lərdən 14 nümayəndə iştirak edib. Onlar vətəndaş cəmiyyəti təşkilatlarının idarə edilməsi üçün beynəlxalq standartların genderə həssas alətlərlə zənginləşdirilməsi üçün məlumatlandırılıblar.
Təlimçilər Mehriban Zeynalova və Günel Aslan seminar iştirakçılarını məişət zorakılıqlarının qarşısını almağın fərqli mexanizmləri ilə praktiki məşğələlər vasitəsilə tanış edib.
Hazırladı: Murad Əmiraslanov,
14 yaş, Mingəçevir
