Gürcüstan səfərində olan müdafiə naziri general-polkovnik Zakir Həsənov oktyabrın 16-sı paytaxt Tbilisidə Silahlı Qüvvələrin Baş Qərargah rəisi general-mayor Vladimir Çaçibaya ilə görüşüb.

Mod.gov.az-ın məlumatına görə, Azərbaycanla Gürcüstan arasında əməkdaşlıq təcrübəsini müzakirə edən tərəflər bu münasibətlərin bölgədə təhlükəsizliyin təmin olunmasına zəmin yaratdığını vurğulayıblar.

Görüşdə Silahlı Qüvvələrin rəhbər heyətlərinin qarşılıqlı səfərlərinin, o cümlədən hərbi mütəxəssislərin görüşlərinin təşkili və keçirilməsinin iki ölkə arasında əməkdaşlığın inkişafına və yeni fəaliyyət istiqamətlərinin müəyyən edilməsinə köməklik göstərəcəyi bildirilib.

Tərəflər Gürcüstanın da iştirakı ilə üçtərəfli və ikitərəfli formatda birgə təlimlərin keçirilməsinin Silahlı Qüvvələrin bölmələri arasında əməliyyat uzlaşmasının əldə olunmasına və regional təhlükəsizliyə öz töhfəsini verəcəyinə əminlik ifadə ediblər.