Dövlət komitəsi 9 aya yekun vurub
Əmlak Məsələləri Dövlət Komitəsi yanvar-sentyabr aylarında gördüyü işlərin hesabatını verib. Oktyabrın 16-da yayılan rəsmi məlumata görə, müşavirədə çıxış edən komitə sədri Kərəm Həsənov deyib ki, 9 ayda dövlət əmlakının qorunub saxlanması və ondan səmərəli istifadə olunması ilə bağlı 1032-yə yaxın monitorinq aktı təhlil edilib, 5000-dən çox dövlət müəssisə və təşkilatından illik xüsusi hesabatlar elektron qaydada yığılıb, hazırda təhlillər aparılır.
Hesabata əsasən, yanvar-sentyabr ayları ərzində özəlləşdirmə portalından 600 minə yaxın istifadə qeydə alınıb, fəaliyyətə başladığı dövrdən portaldan yararlananların sayı 960 mini keçib.
9 ay ərzində dövlət əmlakının özəlləşdirilməsi ilə bağlı 40-a yaxın hərrac keçirilib.
Müşavirədə bildirilib ki, elektron kadastr uçotunun işləri yekunlaşmış 12 rayonda bələdiyyə xəritələrinin hazırlanması davam edir. 2017-ci ildə 14 rayonda torpaqların elektron uçotuna alınması işinin tam yekunlaşması nəzərdə tutulur. Ümumi ərazisi 130 min hektar olan 53 rayon mərkəzi və ona bitişik şəhər və qəsəbələrdə daşınmaz əmlaklar barədə elektron kadastr məlumat bazasının yaradılması, ərazinin rəqəmsal kadastr xəritəsinin tərtibi işləri davam edir.
Vurğulanıb ki, 57 şəhər və rayon, o cümlədən 156 qəsəbə və 1533 kənd yaşayış məntəqəsi üzrə 30 minə yaxın küçə və prospekt, 600 mindən artıq giriş ünvan nömrələri Ünvan Reyestri İnformasiya Sisteminə daxil edilib.
Torpaqların səmərəli istifadə olunması və mühafizəsinə nəzarət məqsədilə monitorinqlər və reydlərin keçirilməsi davam etdirilib. Hesabat dövrü ərzində 744 hal üzrə inzibati protokollar tərtib olunub. Ümumilikdə indiyədək 1900-a yaxın inzibati protokol hazırlanıb.
Müşavirədə bildirilib ki, hüquqi və fiziki şəxslərə kənd təsərrüfatı məqsədi ilə 165 min hektara yaxın torpaq sahəsi icarəyə verilib.
9 ay ərzində 17 “Kütləvi çıxarış” kampaniyası keçirilib, daşınmaz əmlakın qeydiyyatı ilə bağlı fəaliyyət göstərən mobil ofislər vasitəsilə vətəndaşlardan 60 mindən çox müraciət qəbul olunub.
150 minə yaxın daşınmaz əmlak obyekti üzərində mülkiyyət hüquqları qeydiyyata alınıb.
