Müdafiə naziri Zakir Həsənov oktyabrın 16-sı Tbilisidə gürcüstanlı həmkarı Levan İzoria ilə bir araya gəlib. Mod.gov.az bildirir ki, regiondakı hərbi-siyasi vəziyyətə toxunan tərəflər bu formatda görüşlərin ölkələrin təhlükəsizliyinə təhdid törədən beynəlxalq terrorizm, aqressiv separatizm və digər təzahürlərlə mübarizədə səylərin birləşdirilməsində əhəmiyyət kəsb etdiyini deyiblər.

Nazirlər hərbi sahədə əməkdaşlığın inkişafının iki ölkə arasında münasibətlərin daha da dərinləşməsinə, xüsusilə Müdafiə nazirlikləri arasında qarşılıqlı əlaqələrin genişlənməsinə, eləcə də bölgədə sülhün, sabitliyin və təhlükəsizliyin möhkəmlənməsinə töhfə verəcəyinə əminliklərini ifadə ediblər.

Tərəflər Azərbaycan və Gürcüstan ərazisində həyata keçirən mühüm infrastruktur layihələrinin təhlükəsizliyinin təmin olunmasında formalaşmış ikitərəfli tərəfdaşlığın gücləndirilməsinin vacibliyini də vurğulayıblar.

Görüşdə hərbi, hərbi təhsil, hərbi-texniki sahələrdə əməkdaşlığın perspektivləri və qarşılıqlı maraq doğuran digər məsələlər barədə ətraflı fikir mübadiləsi aparılıb.