BMT-nin elm, təhsil və mədəniyyət qurumu olan YUNESKO-nun baş direktoru postuna seçkinin ilk turu nəticə verməyib. Novator.az-ın məlumatına görə, səsvermə oktyabrın 9-u Parisdə İcraiyyə Şurasının 58 təmsilçisinin iştirakı ilə keçirilib. Namizədlərdən heç biri qələbə üçün lazım olan mütləq səs çoxluğunu qazanmayıb.

Baş direktor postu uğrunda yeddi namizəd mübarizə aparır. Onlardan biri də Azərbaycanın Rusiyadakı səfiri Polad Bülbüloğludur. İlk turda ən çox səs qazananlar Qatar, Fransa və Misir təmsilçiləri olub.

Şuranın prosedur qaydaları beş turadək seçki keçirməyə imkan verir. Sonuncu mərhələdə qalib müəyyən edilməsə, seçkinin nəticəsini püşkatma həll edir.

Reqlament ilkin siyahıya daxil edilmiş bütün iddiaçıların seçkinin hər bir mərhələsində iştirakına imkan yaradır.

İcraiyyə Şurası seçkinin bütün prosedurunu oktyabrın 13-dən gec olmayaraq başa çatdırmağı planlaşdırır. Seçkinin nəticəsi YUNESKO-nun Baş Konfransının 39-cu sessiyasında elan olunacaq.