Daşduzdan əl işləri
AZƏRTAC daşduzdan əl işləri yaradan Naxçıvan şəhər sakini Zülfüqar Zeynalov haqda yazı dərc edib. Qeyd olunur ki, indiyədək 30-a yaxın sənət əsəri ərsəyə gətirən Zülfüqar Zeynalov Azərbaycanda əsərlərini daşduzdan yaradan yeganə sənətkardır.
Zülfüqar Zeynalov deyir ki, əvvəlcə taxtadan, keramikadan müxtəlif suvenirlər, abidələr hazırlayıb, 2004-cü ildə isə daşduzdan ilk əl işi olan qılıncı ərsəyə gətirib.
Onun sözlərinə görə, daşduzla işləmək, ondan sənət əsəri yaratmaq o qədər də asan deyil: “Daşduz adi daş kimi mülayim, “sözəbaxan” olmadığı üçün bu materialla işləyən zaman daha dəqiq və diqqətli olmaq lazımdır. Bu sənət insandan dözüm, səbir, istedad və sevgi tələb edir. Bunlar kompleks şəkildə olanda yaxşı əsər meydana gəlir”.
Usta bildirib ki, bu il sentyabrın 12-də Naxçıvan Muxtar Respublikası Ali Məclisinin sədri “Naxçıvan Duz Muzeyinin yaradılması haqqında” sərəncam verib. O, hazırladığı bütün sənət əsərlərini yaradılacaq Naxçıvan Duz Muzeyinə hədiyyə etməyə hazır olduğunu vurğulayıb.
Zülfüqar usta ən böyük arzusunun daşduzdan Heydər Əliyevin abidəsini yaratmaq olduğunu deyib.
