İspaniyanın “Siqma Dos” sorğu şirkəti əhalinin Kataloniya vilayətində təyin olunmuş müstəqillik referendumuna münasibətini araşdırıb. Sorğu sentyabrın 4-dən 7-dək min nəfər ispaniyalı arasında, “Mundo” qəzeti üçün aparılıb.

Kataloniya hakimiyyəti oktyabrın 1-nə referendum təyin edib. Referendumda bölgə əhalisinin vilayəti müstəqil dövlət elan etmək niyyətinə münasibəti öyrəniləcək. İspaniya hökuməti referendumu qanunsuz sayır və əngəlləməyə çalışır.

Novator.az xəbər verir ki, “Siqma Dos” şirkətinin keçirdiyi sorğunun sentyabrın 11-də açıqlanan nəticələrinə görə, respondentlərin 60,3%-i Kataloniyanın İspaniyadan ayrılmasına yönələn referendumun əleyhinə çıxıb.

Sorğuya cəlb olunanların 29,1%-i referendum təşəbbüsünü dəstəkləyib, 10,6%-i isə məsələyə münasibət bildirməkdə çətinlik çəkib.

Rəyi öyrənilən şəxslərin 45,7%-i 1 oktyabr referendumunun baş tutmayacağını ehtimal edir. 35,9% isə inanır ki, kataloniyalılar Madridin müqavimətinə baxmayaraq səs verə biləcəklər.

Respondentlərin 48%-i Kataloniyanın muxtariyyət statusunun dayandırılmasına tərəfdardır, 33%-i isə bunun əleyhinədir.

Ərazisi 32,1 min kvadrat kilometr olan Kataloniya 1979-cu ildə muxtar vilayət statusu alıb. Vilayət çoxdandır müstəqillik uğrunda mübarizə aparır.

Səidə Hüseynova