Tanınmış meyxanaçı Bayram Kürdəxanılı 56 yaşında faciəli şəkildə dünyasını dəyişib.

Daxili İşlər Nazirliyi mətbuat xidmətinin bununla bağlı yaydığı məlumatda deyilir ki, Bayram Kürdəxanılını avqustun 23-ü gecə saat 2 radələrində yolu piyada keçərkən avtomobil vurub.

Hadisə Sabunçu rayonunun Kürdəxanı qəsəbəsində baş verib. “Pejo” markalı avtomobili Bakı şəhər sakini Ramin Fərhadov idarə edirmiş.

Meyxanaçı xəstaxanaya yerləşdirilsə də, onun həyatını xilas etmək mümkün olmayıb.

Sabunçu Rayon Polis İdarəsi hadisəni araşdırır.

Qeyri-rəsmi yayılan məlumatlarda bildirilir ki, Bayram Kürdəxanılı həmin gecə toy mərasimindən evə qayıdırmış.

Bayram Kürdəxanılı (Quliyev Bayramqulu Məşədi Məmmədqulu oğlu) 1961-ci il dekabrın 31-də Kürdəxanıda doğulub. Qəsəbədəki 113 saylı orta məktəbi bitirib. Meyxana sənətinə kiçik yaşlarından gəlib.

O, 1982-85-ci illərdə AzTV-də işləyib.

Bayram Kürdəxanılı 2014-cü il iyulun 12-dən 2015-ci il fevralın 3-dək narkotik vasitələrin qanunsuz dövriyyəsində təqsirli bilinərək həbsdə saxlanıb.