Avqustun 23-də prezident İlham Əliyev Bakının Xətai rayonundakı 257 nömrəli tam orta məktəbin yeni korpusunda yaradılan şəraitlə tanış olub.
AZƏRTAC xəbər verir ki, məktəbin 1176 şagird yerlik mövcud korpusu 1974-cü ildən fəaliyyət göstərir. Məktəbdə 38 sinif otağı, 3 informatika kabineti, 3 laboratoriya, idman və akt zalları, yeməkxana var. Həmin korpus Bakı şəhərinin və onun qəsəbələrinin sosial-iqtisadi inkişafına dair dövlət proqramı (2011-2013-cü illər) çərçivəsində əsaslı təmir edilib.
Məktəbin yeni tikilən korpusu üçmərtəbəlidir. Burada 24 sinif otağı, 1 informatika kabineti, fizika, kimya və biologiya laboratoriyaları var.
672 şagird yerlik əlavə korpus təhsil ocağında birnövbəli dərs rejiminə keçməyə imkan yaradır. Yeni korpusun istifadəyə verilməsi ilə 257 nömrəli tam orta məktəb 1848 şagird yerlik olacaq.
