Səhiyyə Nazirliyi nikah müayinəsi ilə bağlı yeni rəqəmlər açıqlayıb.

Nikaha daxil olmaq istəyən şəxslər 2015-ci il iyunun 1-dən müvafiq orqana təqdim etdikləri ərizəyə tibbi müayinədən keçdiklərini təsdiq edən arayış da əlavə etməlidir. Bu arayışın təqdim olunmaması nikahın bağlanmasına mane olan hallar sırasına daxil edilib.

Nikaha daxil olan şəxslərdən biri özündə zöhrəvi xəstəliyin və immun çatışmazlığı virusunun törətdiyi xəstəliyin olmasını o biri tərəfdən gizlətdikdə digər tərəf nikahın etibarsız sayılması tələbi ilə məhkəməyə müraciət edə bilər.

Tibbi müayinə və məsləhətlər nikaha daxil olmaq istəyən şəxslərin və ya onlardan birinin yaşayış yeri üzrə dövlət və bələdiyyə tibb müəssisəsində pulsuz aparılır.

İyulun 14-də yayılan yeni hesabata görə, nikaha daxil olmaq istəyənlərin icbari tibbi müayinəsi tətbiq olunduğu vaxtdan 2017-ci il iyun ayının sonuna qədər müayinədən 291 min 431 nəfər keçib. 12036 nəfərdə talassemiya daşıyıcılığı, 1143 nəfərdə sifilis, 209 nəfərdə isə QİÇS aşkar olunub.

2017-ci ildə 63 min 137 nəfər müayinələrə cəlb edilib, 1853 şəxsdə talassemiya daşıyıcılığı (onlardan 19-da hər iki cütlük olmaqla) qeydə alınıb. 259 nəfərdə sifilis, 46 nəfərdə isə HİV1/2 QİCS tapılıb.