Hansı ölkədə çox yeriyirlər?
ABŞ-ın Stenford Universitetinin alimləri smartfonlardan götürülmüş bilgilərdən yararlanaraq dünyanın müxtəlif ölkələrinin sakinlərinin fiziki fəallığını yoxlayıblar. Novator.az-ın məlumatına görə, araşdırmaya 111 ölkədən 717 min kişi və qadın cəlb olunub. Həmin adamların 95 gün ərzində piyada hərəkəti izlənib.
Alimlər smartfonlarda quraşdırılmış akselerometrlərin köməyi ilə adamların addımlarını sayıblar. Hesablama göstərib ki, araşdırılan ölkələrin sakinləri gündə orta hesabla 4 min 961 addım atıb.
Tədqiqatın nəticələrinə görə, ən çox piyada hərəkət edən Honkonq (gündə 6880 addım) və Çin (gündə 6189 addım) əhalisidir.
Daha az piyada gəzən Malayziya (gündə 3963 addım), Səudiyyə Ərəbistanı (gündə 3807 addım) və İndoneziya (gündə 3513 addım) sakinləridir.
Səidə Hüseynova
