Novator.az işğalçı Dağlıq Qarabağ rejiminə indiyə qədər kimlərin rəhbərlik etməsinə nəzər salıb.
Qondarma rejimin “parlamenti” iyulun 19-da “prezident seçkisi” keçirəcək. “Prezident postuna” iki namizəd var: rejimin indiki başçısı Bako Saakyan və müxalifətçi Eduard Aqabekyan. Bu seçkidə seçiləcək “prezidentin” səlahiyyət müddətinin 3 il olması nəzərdə tutulur.
1988-ci ilin fevral ayında ermənilər Azərbaycanın Dağlıq Qarabağ Muxtar Vilayətinin Ermənistanın tərkibinə verilməsi tələbi ilə separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci il sentyabrın 2-də ermənilər Dağlıq Qarabağ Muxtar Vilayətinin və keçmiş Şaumyan rayonunun (Goranboy rayonunun tərkib hissəsidir) ərazisini “müstəqil dövlət” elan edib. Bunun ardınca işğalçı müharibə alovlanıb.
1991-ci il noyabrın 26-da Azərbaycan parlamentinin qərarı ilə Dağlıq Qarabağ Muxtar Vilayəti ləğv olunub.
1994-ci ilin may ayında elan olunan atəşkəsə qədər Ermənistan Dağlıq Qarabağı və onun ətrafındakı 7 rayonu işğal edib.
Novator.az bildirir ki, Dağlıq Qarabağ rejiminin ilk rəhbəri Leonard Petrosyan olub. O, qondarma rejimə 12 sentyabr 1991-ci ildən 8 yanvar 1992-ci ilədək “Ali Sovetin sədri” kimi rəhbərlik edib.
8 yanvar-14 aprel 1992-ci ildə “Ali Sovetin sədri”, yəni işğalçı rejimin rəhbəri postunda Artur Mkrtçyan əyləşib.
14 aprel 1992-ci ildən “Ali Sovetin” sədrinin səlahiyyətlərini sədr müavini Georgi Petrosyan icra edib.
15 avqust 1992-ci ildə Dağlıq Qarabağda “Dövlət Müdafiə Komitəsi” yaradılıb. Bu qurumun sədri seçilən Robert Köçəryan işğalçı rejimə rəhbərlik etməyə başlayıb.
21 dekabr 1994-cü ildə “parlament” Robert Köçəryanı “prezident” seçib.
24 noyabr 1996-cı ildə Robert Köçəryan “ümumxalq seçkisində” postunu əlində saxlayıb.
Robert Köçəryan 1997-ci il martın 20-də Ermənistan rəhbərliyinə keçdikdən sonra rejimə müvəqqəti Leonard Petrosyan rəhbərlik edib.
Bunun ardınca Arkadi Qukasyan rəhbərliyə gəlib. O, 1 sentyabr 1997-ci ildə və 11 avqust 2002-ci ildə “prezident” seçilib.
19 iyul 2007-ci ildən rejimə Bako Saakyan başçılıq edir.
İşğalçı rejim 1991-ci ildən indiyəcən seçki adı altında daha 20 qanunsuz aksiya keçirib: 6 “parlament seçkisi”, 5 “prezident seçkisi”, 6 “bələdiyyə seçkiləri”, 3 “referendum”.
