Fransada prezident seçkisinin ikinci turunun ilkin nəticələri açıqlanıb. Novator.az-ın məlumatına görə, mayın 7-də keçirilmiş seçkidə “İrəli” hərəkatının lideri Emmanuel Makron 66%-dən çox səslə qalib gəlib. Milli Cəbhənin lideri Marin Le Pen 33%-dən bir qədər çox səs toplayıb.

Aprelin 23-də keçirilmiş ilk turda Emmanuel Makron 24,01%, Marin Le Pen 21,3% səslə digər 9 namizədi qabaqlamışdılar.

Emmanuel Makron 1977-ci il dekabrın 21-i Amyen şəhərində anadan olub. Paris Siyasi Tədqiqatlar İnstitutunu və Milli Administrasiya Məktəbini bitirib. Sosialist Partiyasının üzvü olub. Bank sektorunda çalışıb, Fransa prezidenti yanında baş katibin müavini olub. 2014-2016-cı illərdə iqtisadiyyat, sənaye və rəqəmli texnologiyalar naziri postunu tutub. 2016-cı ildə “İrəli” hərəkatını yaradıb.

Emmanuel Makron Fransanın 8-ci prezidentidir. İndiki prezident Fransua Olanddan əvvəl dövlət başçısı postunu Şarl de Qoll, Jorj Pompidu, Valeri Jiskar d’Esten, Fransua Mitteran, Jak Şirak və Nikola Sarkozi tutublar.

Emmanuel Makronun xanımı ondan 24 yaş böyük olan Bricit Tronyedir. Onlar 2007-ci ildə ailə qurublar.

Bricit Tronyenin əvvəlki ərindən üç uşağı var. Emmanuel Makron yeddi nəvənin ögey babasıdır.