ABŞ Senatı prezident Donald Trampın təqdimatına baxaraq Aleksander Akostanı əmək naziri postuna təsdiqləyib. Novator.az-ın məlumatına görə, səsvermə aprelin 27-də keçirilib. Beləliklə, prezident səlahiyyətlərinin 100-cü günündə Donald Trampın kabineti tam formalaşıb.

Donald Trampın 14 naziri Senatda daha əvvəl təsdiq olunub: Reks Tillerson – dövlət katibi (xarici işlər naziri), Ceyms Mettis – müdafiə naziri, Con Kelli – daxili təhlükəsizlik naziri, Ceff Seşns – ədliyyə naziri (baş prokuror), Betsi Devos – təhsil naziri, Eleyn Lan Çao – nəqliyyat naziri, Tomas Prays – səhiyyə və sosial xidmətlər naziri, Stiven Mnuçin – maliyyə naziri, Devid Şulkin – veteranlarla iş naziri, Uilbur Ross – ticarət naziri, Rayan Zinke – daxili işlər naziri, Sonni Perdyu – kənd təsərrüfatı naziri, Ben Karson – tikinti və şəhər inkişafı naziri, Rik Perri – energetika naziri.

Donald Tramp 1946-cı il iyunun 14-də Nyu-York ştatında doğulub. 1968-ci ildə Pensilvaniya Universitetinin Uorton Biznes Məktəbini bitirib, bütün karyerasını tikinti biznesinə həsr edib. 1999-cu ildən Respublikaçılar Partiyasının üzvüdür.

Ötən il noyabrın 8-də keçirilmiş ümumxalq seçkisində Respublikaçılar Partiyasının namizədi olmuş Donald Tramp Demokratlar Partiyasından Hillari Klintonu məğlub edib. O, 538 nəfərlik Seçicilər Kollegiyasına 306, Hillari Klinton isə 232 nümayəndə qazanıb. Seçicilər Kollegiyası dekabrın 19-da prezident seçkisi ilə bağlı yekun qərarını verib. Səsvermədə 304 nəfər Donald Trampı, 227 nəfər Hillari Klintonu dəstəkləyib. Seçicilər Kollegiyasındakı səsvermənin nəticəsi Konqresin yanvarın 6-da keçirilən iclasında təsdiqlənib. Yanvarın 20-də Donald Tramp and içərək səlahiyyətlərinin icrasına başlayıb.