İqtisadiyyat Nazirliyinin Sahibkarlığa Kömək Milli Fondu aprelin 27-si Qobustan rayonunun Mərəzə qəsəbəsində işgüzar forum keçirib. Forumda Dağlıq Şirvan iqtisadi rayonundakı sahibkarlara 1,5 milyon manat güzəştli kredit verilib. Kreditlərin əsasən heyvandarlıq, quşçuluq, müalicə-sağlamlıq kompleksinin inşası və başqa sahələrin inkişafına yönəldiləcəyi, 100-ə yaxın yeni iş yerinin açılmasının mümkün olacağı bildirilir.

Economy.gov.az-ın məlumatına görə, forumda çıxış edən Sahibkarlığa Kömək Milli Fondunun icraçı direktoru Şirzad Abdullayev 2017-ci ilin ötən dövründə sahibkarlıq subyektlərinin 200-ə yaxın investisiya layihəsinin maliyyələşdirilməsinə 25 milyon manat güzəştli kredit ayrıldığını, bu investisiya layihələrinin reallaşdırılmasının 700-ə yaxın yeni iş yerinin yaradılmasına imkan verdiyini bildirib.

Rəsmi hesabata əsasən, indiyədək Dağlıq Şirvan iqtisadi rayonunda fəaliyyət göstərən sahibkarlıq subyektləri 1900-ə yaxın investisiya layihəsinin maliyyələşdirilməsi üçün 69,1 milyon manat güzəştli kredit alıb.