Vaşinqtonda siyasi məhbuslara dəstək aksiyası keçirilib
Bir qrup azərbaycanlı fəal yanvarın 31-i ABŞ-ın paytaxtı Vaşinqtonda “Azərbaycandakı siyasi məhbuslara dəstək verin!” tədbiri keçirib. ABŞ-ın və digər ölkələrin nümayəndələrinin də iştirak etdiyi aksiyada 3000 dollar toplanıb. İştirakçılar Azərbaycanda siyasi məhbus sayılan şəxslərə məktublar yazıb, açıqcalar imzalayıblar.
“Azadlıq” radiosunun məlumatına görə, tədbirin təşkilatçılarından Aynur Cəfər ianə kampaniyasının məhbus ailələrinə yardım məqsədi daşıdığını deyib. Digər təşkilatçı Tamara Qriqoryeva deyib ki, siyasi məhbuslara onların unudulmadığını xatırlatmaq, bütün dünyadan insanların onların yanında olduğunu bildirmək çox vacibdir.
1994-1997-ci illərdə ABŞ-ın Azərbaycanda səfiri olmuş Riçard Kozlariç tədbirdə Azərbaycanla bağlı xatirələrindən danışıb, siyasi baxışlarına görə həbs olunan insanlara yardımın mühümlüyünü vurğulayıb.
Tədbirdə azərbaycanlı fotoqraf Cahangir Yusifin fotosərgisi nümayiş etdirilib. Fotosərgidə məhbusların və ailə üzvlərinin fotoları yer alıb.
Azərbaycanın bəzi hüquq müdafiəçiləri ölkədə 167 nəfər siyasi məhbusun olduğunu iddia edir.
Avropa Şurasının meyarlarına görə, azadlıqdan məhrum edilən şəxsə bu hallarda siyasi məhbus kimi baxılmalıdır: saxlanma fikir, vicdan və din azadlığı, fikrin ifadə olunması və informasiya azadlığı, toplaşma və birləşmə azadlığı pozulmaqla həyata keçirilibsə; saxlanma istənilən cinayətlə əlaqəsi olmadan siyasi səbəblərdən həyata keçirilibsə; həbsdə saxlamanın müddəti və ya onun şərtləri şəxsin ittiham olunduğu cinayətə proporsional deyilsə; vətəndaş digər şəxslərlə müqayisədə ayrı-seçkilik əsasında saxlanıbsa və ya saxlama ədalətsiz məhkəmə çəkişməsinin nəticəsidirsə və bu, hakimiyyətin siyasi motivləri ilə bağlıdırsa.
