Ötən il dekabrın 15-də güclü külək “Azneft” İstehsalat Birliyinin neft yığım məntəqələrinin birində estakadanı dənizə uçurmuş, 10 neftçi batmış, həmin gün onlardan 1-nin meyiti tapılmışdı.

Dövlət Dəniz Administrasiyasında Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, SOCAR və Azərbaycan Xəzər Dəniz Gəmiçiliyi ilə birgə yaradılan axtarış-xilasetmə qərargahı fevralın 1-də Neftçala rayonunun 1-ci Mayak kəndi ərazisində, sahildə meyit aşkarlandığını açıqlayıb. APA-nın məlumatına görə, meyiti tapılan şəxs 15 dekabr faciəsində itkin düşən neftçi Həsənağa Hacıəliyevdir. Ancaq axtarış-xilasetmə qərargahı hələ bu haqda rəsmi məlumat yaymayıb.

2015-ci il dekabrın 4-də güclü tufan “Neft daşları”ndakı 501 saylı özüldə estakada döşəməsini üstündəki yaşayış köşkü ilə birlikdə dənizə atmış, 3 nəfər itkin düşmüşdü. Onlardan birinin meyiti aşkar edilib. Həmin gün Xəzərdəki “Günəşli” yatağının 10 saylı dərin dəniz özülündə sualtı qaz xəttinin dayaq borusu qırılmış, boru kəməri zədələnmiş, şiddətli yanğın olmuş, 30 nəfər itkin düşmüşdü. Onlardan 12-nin meyiti tapılıb.