Almatıdakı beynəlxalq təlimdə “Azərbaycan Uşaqları” da təmsil olunur
“İnnovasiyalar üçün tərəfdaşlıq” proqramının dəvəti ilə “Azərbaycan Uşaqları” İctimai Birliyinin sədri Kəmalə Ağazadə Qazaxıstanın Almatı şəhərində keçirilən “Şəbəkə təşkilatları: idarəetmə və praktika” adlı beynəlxalq təlimdə iştirak edir.
Qazaxıstan, Tacikistan, Qırğızıstan və Türkmənistanın da müxtəlif ictimai qurumları və QHT-lərinin, eləcə də vətəndaş cəmiyyəti fəallarının təmsil oldunduğu tədbirdə 3 gün ərzində Avropadan gəlmiş təlimçilər iştirakçılara şəbəkələrdə birləşən təşkilatların institusional inkişafı yolları, dünya tərcrübəsi, perspektivləri, üstünlüklər barədə geniş məlumat verəcəklər.
Təlimin əsas məqsədlərindən biri də müxtəlif ölkələrdən olan və birgə məqsədlər üçün səylərini birləşdirən ictimai təşkilatların gələcək əməkdaşlığına səy göstərmək, onların ideyalarının həyata keçirilməsinə təkan verməkdir.
Qeyd olunmalıdır ki, bu səfər “İnnovasiyalar üçün tərəfdaşlıq – P4I” proqramı çərçivəsində gerçəkləşmişdi. Qazaxıstanın “АRGO” Vətəndaş Cəmiyyətinin İnkişafı Assosiasiyası həm ölkədaxili, həm də ölkələrarası vətəndaş cəmiyyəti təşkilatlarının inklüziv şəbəkələri arasında əlaqəsi və davamlı inkişafına dəstək yolu ilə vətəndaş cəmiyyətinin möhkəmlənməsinə istiqamətlənmiş “İnnovasiyalar üçün tərəfdaşlıq – P4I” proqramını həyata keçirir. Proqramı dövlət və ictimai sektorun innovativ yanaşmalar vasitəsilə sosial və iqtisadi problemlərin birgə həll edilməsində səlahiyyətli vətəndaş cəmiyyətinin qurulmasına əhəmiyyətli töhfə verməli, iştirakçı ölkələrin regional əməkdaşlığı ilk növbədə əlilliyi olan insanların hüquqları, ekologiya, sosial xidmətlər, gənclərin ictimai həyatda iştirakı, gender bərabərliyi kimi əhəmiyyətli mövzuları əhatə etməlidir.
Proqram çərçivəsində müxtəlif fəaliyyət sahələrində çalışan qeyri-hökumət təşkilatlarını özündə birləşdirəcək onlayn və offlayn platformalar yaradılacaq ki, bu da onların fəal təlimləndirilməsinə və potensialının artırılmasına yardım edəcək. Beləliklə, “İnnovasiyalar üçün tərəfdaşlıq – P4I” vətəndaş cəmiyyəti təşkilatları arasında əlaqələrin yaradılması, təcrübə və məlumat mübadiləsinə kömək edəcək, onların dayanaqlığının möhkəmlənməsi, effektivliyinin artırılması və dəyişən şəraitə uyğunlaşmaq bacarığının artmasına istiqamətlənəcək.
