Komitə sədri kadr çatışmazlığından gileylənib
2016-cı ildə Azərbaycan 180-dən çox ölkə ilə ticarət həyata keçirib. Dövlət Gömrük Komitəsinin sədri Aydın Əliyev yanvarın 19-da keçirdiyi mətbuat konfransında belə deyib. O, xarici ticarət dövriyyəsində azalma müşahidə edildiyini vurğulayıb: “2015-ci ildə ixrac 12 milyard 729 milyon dollar olduğu halda ötən il bu göstərici 9 milyard 143 milyona düşüb. İdxal əməliyyatları 9 milyard 216 milyondan 8 milyard 323 milyona qədər azalıb”.
Komitə sədri qeyd edib ki, azalmalar qlobal iqtisadi böhranla və neftin ucuzlaşması ilə əlaqədardır: “Ancaq gömrük orqanları qarşıda duran proqnozu 26 faizdən yuxarı rəqəmlə yerinə yetirib”.
AZƏRTAC-ın məlumatına görə, Aydın Əliyev ötən il qanunsuz yolla 2 milyon dollardan çox valyutanın ölkədən çıxarılması cəhdinin qarşısının alındığını deyib. O, il ərzində gömrükçülərin 1 ton 136 kiloqramdan çox narkotik vasitə aşkarladığını da qeyd edib.
Dövlət Gömrük Komitəsinin sədri deyib ki, iki il ərzində 503 gömrük əməkdaşı intizam məsuliyyətinə cəlb olunub: “2016-cı ildə 246, 2015-ci ildə isə 257 gömrük orqanı əməkdaşı intizam məsuliyyətinə cəlb olunub və bunlardan 84 nəfəri işdən azad olunub. Gömrük xidməti orqanları əməkdaşlarının 10-u barəsində cinayət işi Baş Prokuror yanında Korrupsiyaya Qarşı Mübarizə Baş İdarəsinə göndərilib. Bununla bağlı araşdırmalar davam edir”.
Aydın Əliyev qeyd edib ki, gömrük orqanları kadr qıtlığı çəkir: “Hazırda Dövlət Gömrük Komitəsinin sərhəd-keçid məntəqələrində və Hava Nəqliyyatında Baş Gömrük İdarəsində kadr çatışmazlığı problemi mövcuddur”.
