Azərbaycanda sosial şəbəkələri və bloqçu fəaliyyətini tənzimləyən qanun layihəsinin hazırlanması təklif olunur.

Modern.az xəbər verir ki, Mətbuat Şurasının sədri, deputat Əflatun Amaşov Milli Məclisin insan hüquqları komitəsinin yanvarın 19-da keçirilən iclasında belə bir təşəbbüslə çıxış edib. O deyib ki, Azərbaycanda bloqçuların fəaliyyətinə fərqli yanaşmalar var və bu fəaliyyətin sərhədləri müəyyən edilməyib: “Ona görə də bu sahəni tənzimləyən yeni qanuna ehtiyac var”.

“Yeni Azərbaycan” qəzetinin baş redaktoru, deputat Hikmət Babaoğlu təklifi dəstəkləyib. O deyib ki, Türkiyədə sözügedən məsələ ilə bağlı qanunvericilik bazası hazırlanır: “Əgər razılıq olarsa, Əflatun müəllimlə birgə belə bir qanunvericilik təşəbbüsü ilə çıxış edə bilərik”.

Milli Məclis Aparatının dövlət quruculuğu üzrə qanunvericilik şöbəsinin sektor müdiri Sarvan Sadıqov təşəbbüsü dəstələyərək bildirib ki, bu sahədə xaos hökm sürür: “Kim nə istəyir onu yazır. Ona görə də bu sahənin qanunla tənzimlənməsinə ciddi ehtiyac var”.