Dağlıq Qarabağdakı işğalçı rejimin başçısı Bako Saakyan yanvarın 19-da “konstitusiya referendumu” keçirilməsinə fərman verib. Novator.az-ın məlumatına görə, “referendum” fevralın 20-nə təyin edilib.

İşğalçı rejimin yeni “konstitusiya” layihəsində 2006-cı ildə qəbul edilmiş “konstitusiya”dan əsas fərq bölgənin adında dəyişiklik olacaq. Separatçı rejim “Dağlıq Qarabağ Respublikası” adından imtina edib “Arsax Respublikası” variantına keçməyi planlaşdırır.

İndiki “konstitusiya”da Dağlıq Qarabağ rejimi “prezident-parlament respublikası”dır. “Hökumət”i “parlament” formalaşdırır, prezident isə “dövlət başçısı”dır.

Yeni “konstitusiya” layihəsi işğalçı rejimin “prezident respublikası”na çevrilməsini nəzərdə tutur. “Ümumxalq seçkisi”ndə seçilən “prezident” icra hakimiyyətinə rəhbərlik edəcək.

Azərbaycanın Dağlıq Qarabağ vilayəti 1991-ci il sentyabrın 2-də özünü müstəqil dövlət elan edib. Hazırda Dağlıq Qarabağ bölgəsi işğalçı rejimin nəzarətindədir. Ermənistan Silahlı Qüvvələri Dağlıq Qarabağdan əlavə 7 rayonu zəbt edib.

Azərbaycan torpaqlarının işğalı, etnik təmizləmələrlə qurulmuş separatçı Dağlıq Qarabağ rejimi 1991-ci ildən indiyəcən seçki adı altında 19 qanunsuz aksiya keçirib: 6 “parlament seçkisi”, 5 “prezident seçkisi”, 6 “bələdiyyə seçkiləri”, 2 “referendum”.