İtkin neftçilərin axtarışına 40-dan çox gəmi cəlb olunub
“Azneft” İstehsalat Birliyinin neft yığım məntəqəsində baş vermiş faciə ilə əlaqədar yaradılmış qərargah Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, Dövlət Dəniz Administrasiyası, SOCAR və “Azərbaycan Xəzər Dəniz Gəmiçiliyi” QSC-nin mütəxəssislərinin iştirakı ilə axtarış-xilasetmə əməliyyatlarının planını təsdiqləyib, axtarış-xilasetmə sektorlarını müəyyən edib.
Dekabrın 15-də “Azneft”in Nəriman Nərimanov adına Neft-Qaz Çıxarma İdarəsinin 3 saylı neft yığım məntəqəsində estakadanın bir hissəsinin uçması nəticəsində 10 nəfər Xəzər dənizinə düşüb. Həmin gün onlardan birinin meyiti tapılıb.
Qərargahın məlumatına görə, itkin neftçilərin axtarışını Müdafiə Nazirliyi, Fövqəladə Hallar Nazirliyi, Dövlət Sərhəd Xidməti, SOCAR və “Azərbaycan Xəzər Dəniz Gəmiçiliyi” QSC-yə məxsus ümumilikdə 44 gəmi və üzən vasitə, 6 helikopter, habelə 700-dən artıq canlı qüvvə aparır.
Fövqəladə Hallar Nazirliyi və Dövlət Sərhəd Xidmətinin canlı qüvvələri sahilboyu ərazilərdə də axtarış həyata keçirir.
