Trans-Anadolu qaz kəməri (TANAP) layihəsi üzrə işlərin 55 faizi tamamlanıb. AZƏRTAC xəbər verir ki, TANAP-ın baş direktoru Saltuk Düzyol belə deyib.

Baş direktorun sözlərinə görə, TANAP-ın tikintisi işləri çərçivəsində təxminən 10 min işçi çalışır: “Türkiyəyə nəql ediləcək ümumilikdə 6 milyard kubmetrlik qazın 2018-ci il iyunun sonunda 2 milyard kubmetri qəbul olunacaq. Həmin həcm sonrakı il 4 milyard kubmetrə, daha sonrakı il 6 milyard kubmetrə çatacaq”.

Saltuk Düzyol bildirib ki, 11,7 dollar ilkin dəyəri olan TANAP layihəsinin tələb olunan kapital xərcləri hazırda 8,5 dollara düşüb.

Xəzərin Azərbaycan sektorundakı “Şahdəniz-2” yatağından çıxarılan qazı Türkiyəyə və bu ölkədən Avropaya nəql edəcək TANAP Türkiyə-Gürcüstan sərhədində Cənubi Qafqaz Boru Kəmərinə, Türkiyə-Yunanıstan sərhədində isə Trans-Adriatik (TAP) qaz kəmərinə birləşəcək. Uzunluğu 1810 kilometr olan TANAP-ın Əskişəhərə qədər olan hissəsinin 2018-ci ilin ortasında istismara verilməsi nəzərdə tutulur. Layihə üzrə Azərbaycan şirkətlərinin xərclərinin 2020-ci ilədək ümumilikdə 6,2 milyard dollar olacağı bildirilir.