Qırğızıstan: seçici konstitusiyada yenilikləri dəstəklədi
Qırğızıstanda dekabrın 11-də keçirilmiş konstitusiya referendumunun nəticələri açıqlanıb. Novator.az xəbər verir ki, Mərkəzi Seçki Komissiyasının ilkin hesabatına görə, referenduma qatılan seçicilərin 79,6%-i ana qanuna dəyişikliklər təklifini dəstəkləyib.
Referendum aktı layihəsində baş nazirin səlahiyyətlərini artırmaq, deputata eyni zamanda baş nazir və ya baş nazirin müavini postu tutmaq hüququ verilməsi təklif olunub. Layihə məhkəmə sisteminin, Konstitusiya Məhkəməsinin fəaliyyətində yenilik təkliflərini də əhatə edib.
Parlament respublikası olan Qırğızıstanda baş nazirin rəhbərlik etdiyi hökumət ali icraedici orqandır. Baş nazir postuna namizədi parlamentdə deputatların yarıdan çoxunu təşkil edən fraksiya və ya koalisiya irəli sürür. Parlament hökumətin tərkibini və proqramını təsdiqlədikdən sonra prezident baş naziri və hökumət üzvlərini vəzifəyə təyin edir.
Referendumla eyni vaxtda 22 şəhər və 389 kənddə yerli məclislərə seçkilər olub. Paytaxt Bişkekin 45 nəfərdən ibarət Məclisinə seçkidə Sosial Demokrat (24,9%) və Ata Yurd (23,8%) partiyalarının önə çıxdığı bildirilir.